Multilingual Folk Tale Database


Information

Unknown author - 13CAD

Original version in Middle Dutch

Source: Esopet (nr. 13)

Country of origin: Netherlands

Translations

There are no translations available for this story

Add a translation

Den rijc man, den ezel ende die hont

Een aren nam wilen ere vossinnen
Haer jonc; met bliden sinnen
Droech hise te sinen kinden,
Die hi hongherech waende vinden.
Doe was die vossinne gram,
Ende liep tes si ten bome quam,
Daer die aren op sat met sinen broede.
Si bat hem doer omoede,
Dat hi haer kinder weder gave,
Sine bat hem ander have.
Hine wils niet doen, hi hadt ommare,
Want bi sat hoghe boven hare.
Doen was si sere tonghemake;
Si ghinc halen I stake
Al bornende, ende stroes vele:
Daer speelde si van reinaerts spele;
Doen ghinc si met behendicheden
Den boem ontsteken van beneden.
Dat vier sloech op ten neste wart.
Dit sach die aren ende wert vervart.
Doe gaf hi weder ter selver stont
Hare kinder al ghesont.
Dit favelkijn leert riken lieden,
Dat si den weken niet mesbieden.
Doen sijt oec, ic weet I dier,
Datse bornen sal int vier.