Multilingual Folk Tale Database


Information

Unknown author - 13CAD

Retold version in Middle Dutch - 1300

Source: Esopet (nr. 38)

Country of origin: Netherlands

Based on Graculus superbus et pavo (Phaedrus)

Translations

There are no translations available for this story

Add a translation

Een hoverdich groensel

Een groensel dat was hoverdich
Ende vele meer dant was werdich,
Het vant die vederen van den pau,
Die scone was, groene ende blau.
Het versierde soe daer mede,
Det het, bi siere hoverdichede,
Den sinen onwerscepe dede.
Het decte al sine lede
Metten vederen van den pauwen.
Alse dit saghen die, metten clauwen
Trocken si hem die vederen uut,
Ende scoerden hem al sine huut.
Doe moeste dat groensel met onneren
Te sinen maghen wederkeren.
Alsijt dus lelijc comen saghen,
Doe seide daer I van sinen maghen:
‘Dies en hadstu ghenen noet,
Haddi ghenoeghet dijn ghenoet
Ende diere naturen cleder.
Nu wortstu emmermeer te leder
Ende tonwerder met ons allen.’
Dus siet men van den ghenen ghevallen,
Die sine hoverdichede drivet
Met dinghen, die hem niet en blivet.
Wanneer dat hijt heeft verloren,
Soe es hi keytiver dan te voren.