Multilingual Folk Tale Database


Information

Author: unknown author

Translated into Venda

Based on Ananse eni Akekrehemaa

Country of origin: Ghana

Story type: The Fox and the Crane Invites Each Other (ATU 60)

Translations

Afrikaans - viewaligned

Aragonese - viewaligned

Basque - viewaligned

Catalan - viewaligned

Danish - viewaligned

Dutch - viewaligned

English - viewaligned

French - viewaligned

Galician - viewaligned

German - viewaligned

Italian - viewaligned

Judaeo-Spanish - viewaligned

Mapuche - viewaligned

Neapolitan - viewaligned

Nzema - viewaligned

Occitan / Aranese - viewaligned

Portuguese - viewaligned

Russian - viewaligned

Spanish - viewaligned

Venda - aligned

Zulu - viewaligned


Add a translation

Buvhi Anansi la tseda na tshibodempembe

Muñwe musi nga madekwana, buvhi Anansi a dzula fhasi uri a dikande nga tshilalelo tsha u difha. Zwenezwi musi a tshi tou thoma u ñenza genzu la u thoma, ha pfala u ombaomba vothini. A takuwa a ya a vula vothi. A tshi hasha mato a wana hu Tshibodempembe, tshe tsha tshi tshi vhonala tsho neta vhukuma. Tshibodempembe tsha ri, “Anasi, ndi khou humbela u swielelwa. Ndo tshimbila lwendo lulapfulapfu namusi, zwino ndo neta nahone ndi na ndala.”

Fhedzi Anansi o vha e na tseda a sa todi la zwiliwa zwawe na muñwe muthu. A vhamba maano a sa takadzi. Zwenezwi Tshibodempembe tshi tshi tou fhasi thwee tafulani uri tshi levho zwiliwa, Anasi a thoma u zhamba, “Heiwe Mpembe, zwanda zwau zwo tswuka nga maanda! U nga si le nga zwanda zwi re na mashika ngauralo! Tshimbila u yo tamba.” Zwanda zwa Tshibodempembe zwo vha zwo tswuka nangoho nge tsha vha tsho fhedza duvha lothe tshi ndilani. Nangoho ndi fhalaha Tshibodempembe tshi tshi tshimbila nga u ongolowa tsha vhuya tsha swika mulamboni, tsha tamba zwanda, tsha dovha hafhu tsha tshimbila nga u ongolowa tshi tshi vhuya tafulani.

Nga itsho tshifhinga ndi musi Anansi o no thoma kale u kapula zwiliwa. Musi Tshibodempembe tshi tshi sala tshi tshi swika ndi musi zwiliwa zwi tsini na u fhela. Zwenezwi Tshibodempembe tshi tshi tou fhasi thwee uri tshi thome u la zwiliwa, Anasi a thoma u zhamba hafhu, “Heiwe Mpembe, zwanda zwau zwi tshee zwo tswuka! Tshimbila u yo tamba hafhu!” Zwanda zwa Tshibodempembe zwo vha zwo tswuka nangoho nge tsha tshimbila ngazwo tshi tshi yo tamba mulamboni. Tshibodempembe tsha takutshedza hafhu zwi tshi pfisa vhutungu tsha vhuyelela u tamba zwanda hafhu.

Tshi tshi sala tshi tshi kokovha tshi tshi vhuya, tsha wana hu si tshee na zwiliwa. Tshibodempembe tsha lavhelesa Anansi tsha ri” Ndo livhuha no mmbidza uri ri lalele rothe. Arali liñwe duvha na diwana ni tsini na mudi wanga, ni dzhene ri lalele rothe”

Ha mbo fhela tshifhinga, buvhi Anansi a thoma u dzulela u humbula zwe Tshibodempembe tsha mu fulufhedzisa uri tshi do mu kanzwa. Zwenezwoha, liñwe duvha Anansi a mbo ya mudini wa Tshibodempembe nga tshifhinga tsha tshiswitulo, musi duvha li hafhala ntha henefho mulamboni. Tshibodempembe tsho vha tsho di ganamela zwatsho ntha ha tombo, tshi tshi khou tavhela vhasana, vhunga zwibodempembe zwi tshi tou ralo. Musi Tshibodempembe tshi tshi tou vhona Anansi tsha mbo ri, “Ri a vusa Anansi! Wo da u lalela na nne namusi?” Anansi a ri, “Ee, zwi nga vha zwavhudi nga maanda hezwo, ndi a livhuha.” ndala ya Anansi yo vha i tshi khou nana tshothe.

Ndi fhalaha Tshibodempembe tshi tshi dia tshinwi tsha jena madini, Anansi a sala o lindela henefho matomboni khunzikhunzini dza mulambo. Hu si kale Tshibodempembe tsha mbo thunyuwa tsha ri “Khezwoha Anansi. Zwiliwa zwo luga. Kha ri lalele rothe”Tshibodempembe tsha mbo dia tshinwi hafhu tshi tshi ya u la matari madala e tsha a lugisela tshilalelo. Anansi a lingedza u dia tshinwi uri a tsele fhasifhasi madini, zwe vhutoto vhunga buvhi li si tshibodempembe. Zwa konda vhukuma u nupela ngauri o vha a tshi sokou papamala hu si na hune a ya. A lingedza u tou fhufhela, a lingedza u ita tshinwi, zwothe zwa kunda. A kundwa u swika hune zwiliwa zwa vha hone.

Ho no vha kale fhala Anansi a delwa nga muhumbulo. A panga matombo zwikwamani zwa jasi lawe, u swikela a tshi vho lemela lune a kona u nupela madini. A vhona tafula ya tshibodempembe yo tamiwa nga matari madaladala na zwiñwe zwiliwa zwa u difha.

Fhedziha zwenezwi Anansi a tshi kha di ri u a hovhelela zwiliwa, Tshibodempembe tsha mu dzivhisa, tsha ri, “Anansi, ngohongoho ni nga si le zwiliwa no ambara jasi! Fhano mudini a ri iti zwithu ngauralo.” Anansi a bvula jasi. Zwino khakhathi ya vha uri arali a si na matombo a u mu nupedza, u a papamala a humela ntha nnda ha madi.